Matthew 9

Yesu topeu 'aigeda 'i'abihe bwebwe'aneya

(Maki 2:1-12; Luke 5:17-26)

1Coinega Yesu wagai 'igeluwa ma 'ihabala hila 'ina gogowa. 2Ma 'aigeda topeu boda si'ahaliya 'ina 'ebe'eno 'oina ma sinaoleyama Yesu 'oina. Bodaedi 'idi hemisa Yesu 'isanapuya ma topeu 'ihegwaeya 'igwae, “Natugu, 'uyaliyaya, 'ino mumuga galadi 'adi nuwasam 'uloba pwaiya.”

3Ma tupwadi loina 'ana tohe'itao Yesu 'ina gwae sihesagoheya ma taudimo sihehegwaegwae sigwae, “Yesuina 'igwaegwae hopa'ala Yehoba 'oina.”

4Cidi nuwatuhuina Yesu 'isanapu pwaiya ma 'ihegwaediya, 'igwae, “To'aha weyahina 'atemiyega wanuwanuwatuhu galana? 5Ma to'aha wanuwatuhuya yada gwae loheya bewa 'oina ma 'abehega yagwae, ‘Cino mumuga galana yanuwasam pwaiya’, nuwana yada gwae, ‘Cutoholo ma 'utauya’? 6Ma wasanapu 'abehega taugu Loheyaiguina bale'uwa ma sawesawehigu tomota 'idi mumuga galana yanuwasamudi.” Coinega topeuina 'ihegwaeya, 'igwae, “Cutoholo ma 'ino 'ebe'eno 'u'ahali ma 'utauya 'ino gogowa.”

7Coinega topeuina 'itoholowa ma 'itauya 'ina gogowa.’

8Ma bodaedi paihowa bewa si'iteya ma ma'idi he'asisi Yehoba sihehepwatuwe, weyahina tauna Yesu 'ana to'abihewaiwai.

Yesu Madiu 'ibwauweya

(Maki 2:13-17; Luke 5:27-32)

9Coinega Yesu tupwa bewa 'i'ebesineya ma 'itauya, ma loheya 'aigeda 'i'iteya, sanina Madiu, takesi* 'ana hada 'ebe paihowa 'alona 'imiyamiya, 'oinega 'ihegwaeya, 'igwae, “Madiu, 'umuliyegau.” Ta Madiu 'itoholowa ma Yesu 'imuliyeya.

10Muliyetega hada 'aigeda 'oina Yesu 'iluhuwa sabi 'ai ma tolopui gide takesi 'ana to'ewao ma tolopui tupwadi wete sinaoma, ma Yesu ma'ana tomuliyao ma'iyadiyao simiyatoiya.

11Coinega tupwadi Palisiyao si'iteya ma Yesu 'ana tomuliyao 'oidiya sihesilala, sigwae, “To'aha weyahina 'imi tohe'ita takesi 'ana to'ewao ma wete togala tupwadi ba'idanao si'ai'ai hegogona?”

12Ma Yesu gwae bewa 'ihesagoheya ma 'ihegwaediya, “Taudi wahidi waiwaidi geya nuwadi to'abihebwebwe'ana, ma tolohalao hesi. 13Coinega 'ilobwainegomiya ma Yehoba 'ina gwae wanuwa sabwalena Buki He'asisi 'oina, 'igwaeya,

‘Nuwanuwagu 'atemuyamuya, ma geya nuwagu pwaoli.’
Bewa yanaoma geya tobwebwe'ana weyahidi, ma hesi topui sabi 'abihetedi.”

Yesu 'ina gwae hudi* weyahina

(Maki 2:18-22; Luke 5:17-26)

14Ta Yoni 'ana tomuliyao sinaoma ma Yesu sihegwaeya, sigwae, “Tauma ma Palisiyao 'ima tapwalolo weyahina 'ai 'oinega 'ahudi, ma togidega ma 'oinega 'owa 'a tomuliyao geya sida hudi?”

15Coinega Yesu gwae hegehegedi 'i'ebwaediya, 'igwae, “Togidega, sawasawahina hai 'ana toyo'owao sinuwagala 'eguma tohai meloheyana ma'iyadiu siyaliyaliyaya? Nuwana geya, 'awa? Ma wanuwatuhuyahi 'abehega tuta 'inaonaoma ma tohaiina 'i'ebesinedi, ma hesi sinuwagala ma 'e'ahai 'oinega si'etala he'asisi.”

16Ma 'aigeda wete gwae hegehegedi 'ihegwaediya, 'igwae, “Geya sawasawahina ma 'ale'o 'ehauna tupwatupwana 'ale'o miyamiyana tabwabwada, 'amuge gide taigalaina 'ilotaigalasehe. 17Ma geya wete sawasawahina ma we'aha 'ehauna ma waiwaina tasiwa 'wapi 'ebesiwa* miyamiyana 'oina. Ceguma bewa gide tapaipaihowa 'ese, we'aha 'ina seseha 'oinega 'wapiina 'ilotaigala, ma we'ahaina 'ilotasiwa, ma 'oinega 'ebesiwaina 'igala. Ma 'ilobwaineya ma we'aha 'ehauna ma waiwaina tasiwa 'ebesiwa 'ehauna 'alona, ma 'oinega mabwaiyana bwebwe'ana.”

Yesu wahiwahine 'eluwa 'i'abihe bwebwe'anediya

(Maki 5:21-43; Luke 8:40-56)

18Cabwa Yesu 'ihehegwaegwae ma 'aigeda toloina 'inaoma ma Yesu matana 'i'ahetulasa, ma 'igwae, “Bada, natugu wahinena nige 'i'amasa, ma nuwanuwagu 'unaoma ma wahina 'u'abitoho ma 'itoholo hila.”

19Ma Yesu 'itoholowa ta ma'ana tomuliyao toloinaina simuliyeya, 20ma sitautauya, ma wahine 'aigeda bweyahina 'idaudau bolime tuwelo 'oidiya mulidiyega 'inaoma, ma Yesu 'ana 'ale'o papalina 'i'abitohoya. 21Weyahina 'ina nuwatuhu 'atena 'igwaeya, “Ceguma tuwa Yesu 'ana 'ale'omo ya'abitoho, nata yabwebwe'ana.”

22Ma Yesu 'ilo'itahila ta wahineina 'i'iteya, ma 'igwae, “Yauwedo natugu, 'ino hemisega 'ubwebwe'ana pwaiya.” Ma tuta nage 'oina wahineina 'ibwebwe'ana.

23Coinega Yesu 'itauya ma toloinaina 'ina hada 'ilatuwa ma 'i'iteya todou sidoudou ma lololi 'ana tomu'ao lololi simu'amu'adi, ta 'enadi madou hedada. 24Ta Yesu 'ihegwaediya 'igwae, “Walatu. Gwama bewa geya 'i'amasa, ma hesi 'i'eno sineya.” Ma simaluweya.

25Eeta bodaedi silatuwa ma Yesu 'iluhuwa ma gwamaina nimana 'i'abiya, ta mayawasina 'itoholowa. 26Muliyetega wasaina bewa 'i'edadana tupwa mabwaiyana 'oidiya.

Yesu tomata gibugibu 'eluwa 'i'abihe bwebwe'anediya

27Tupwa nage 'oinega Yesu 'itautauyama, tomata gibugibu 'eluwa simuliyeya, ma sibwaubwau 'enadi madouna 'oinega, sigwae, “Debida tubuna ee, 'u'atemuyemuyemai!”

28Ta hadai 'iluhuwa ma tomata gibugibuwedi sinaoma 'oina, ma Yesu 'ihegwaediya, “Togidega wahemisegauwa 'abehega sawasawahigu matami ya'abi he'asilala?” Ma taudi sigwae, “Bada, sawasawahiu.”

29Coinega matadi 'i'abitohodiya ma 'ihegwaediya, “Cimi hemisa 'oidiyega matami si'asilala,” 30ma matadi si'asilala. Ma Yesu loina pa'alina 'i'ebwaediya, 'igwae, “Sahena taiya 'oina wahehepwailegau.”

31Ta hesi sitauya, ma Yesu 'ina loina siligehiya, ma 'ina paihowaina sihepwaila dadaneya tupwa mabwaiyana 'oidiya.

Yesu buwa 'aigeda 'i'abihe bwebwe'aneya

32Ma Yesu ma'ana tomuliyao sitautauya, ma 'aigeda loheya welabana memenana sibuiya sitoeyama Yesu 'oina. 33Ma 'oinega Yesu welabana 'ipa'iya, ma loheyaina 'ibwebwe'ana ma 'ihegwaegwae. Ma boda ma'idi yaliyaya Yesu si'ahwa bwebwe'aneya, ma sigwae, “Geya 'eta taiya 'ina paihowa bewa gide ta'ita Isileli 'alona.”

34Ma hesi Palisiyao sigwaeya, “Welabanao 'idi bada 'ina waiwaiyega Yesu welabanao 'ipa'ipa'idi, ma geya Yehoba 'ina waiwaiyega.”

Yesu tomota 'i'atemuyemuyediya

35Ta Yesu 'asa madoudi ma 'i'iudi 'oidiya 'isakowasiya ma 'idi hada tapwalolowao 'oidiya 'ihe'ita ma 'iloguguya Yehoba 'ina loina tetelina weyahina, ma wete lohala baibaiwana 'oidiyega tomota 'i'abihe bwebwe'anediya.

36Ma boda 'i'itediya ma 'i'atemuyemuyediya, weyahina 'adi mwauwao 'oidiyega geya 'adi to'abihetenamo, gide sipi 'wani'wanidi, geya 'adi to'itayahinamo. 37Ma 'ana tomuliyao 'ihegwaediya, “Mamasalai bwebwe'ana, ma to'eli'eli 'omi hisahisamimo. 38Coinega tanoha taniwagana 'oina wa'ahwanoi ma topaihowao wete 'ihesumanedi, 'ina tanoha si'eli.”